REPUBLIC OF THE PHILIPPINES PHILIPPINE INFORMATION AGENCY

By : Elvira C. Bongosia

TAGBILARAN CITY, Feb. 24 (PIA)Ipahigayon dinhi sa lalawigan sa Bohol sa unang higayon ang Bright Leaf Caravan sa Biyernes, Pebrero 26.

Kini, agi og pagsaulog sa ika-10 ka tuig sa Bright Leaf Agriculture Journalism Awards.

Ang Bright Leaf Agriculture Journalism Awards gilusad niadtong tuig 2007 sa Philip Morris Philippines Manufacturing Inc. (PMPMI).

Gipadayon kini karon sa PMFTC Inc. (PMFTC), ang kumpanya natukod niadtong Pebrero 25, 2010 pinaagi sa kombinasyon sa negosyo tali sa Philip Morris Philippines Manufacturing Inc. (PMPMI) ug Fortune Tobacco Corporation (FTC). Isip nag-una sa merkado sa Pilipinas sa industriya sa tabako, ang PMFTC nikomiter sa paghatud sa gikinahanglang tabang ug pagtagad sa sektor sa agrikultura sa nasud.

Tungod niini, mangita na usab ang kompanyang PMFTC og mga mosalmot alang sa 10th Bright Leaf Agriculture Journalism Awards.

Usa kini ka kompetisyon sa tanang tigbalita sa radyo, TV o print kon gi-unsa niini paghatag og impormasyon sa publiko mahitungod sa agrikultura.

Tumong niini ang pagpahibalo sa publiko kalabot sa mga isyu sa agrikultura dinhi sa nasud pinaagi sa mga tigbalita.

Ang 2016 Bright Leaf Agriculture Journalism Awards nagpangita og mga estorya sa agrikultura nga napatik, nahulagway sa mga programa sa radyo ug TV nga napatik o nasibya gikan Setyembre 1, 2015 taman Agosto 21, 2016.

Sa Peb. 26, makigkita ang mga tinugyanan sa Bright Leaf sa Bohol media nga ipahigayon sa Metro Center Hotel ning syudad sa alas 3 sa hapon aron tubagon ang mga pangutana ug awhagon usab ang mga tigbalita sa lalawigan sa pagsalmot sa maong bagga sa pagsuwat og estorya kabahin sa agrikultura. (ecb/PIA7-Bohol)

- See more at: http://news.pia.gov.ph/article/view/1081456299738/cebuano-news-bright-leaf-caravan-ipahigayon-sa-bohol-#sthash.9IUsvOz4.dpuf